Во организација на Општинскиот совет за безбедност и сообраќај на патишта и СВР Куманово денеска се оддржа традиционалната манифестација „Детски семафор“. На годинашниов натпревар учествуваа екипи од петнаесет основни училишта од три општини-Куманово, Липково и Старо Нагоричане.
– Првопласираните три екипи ќе добијат дипломи за освоени места и ќе имаат право на учество на регионалниот натпревар што годинава ќе се оддржи на деветти мај во Липково, меѓу ученици од општините Куманово, Кратово и Крива Паланка, информира раководителот на отсекот за превенција од СВР Куманово, Виолета Богдановска.
Дипломи ќе им бидат поделени и на најдобрите поединци во две категории, прва група од помала возраст и група која ги опфаќа поголемите ученици.
Општинскиот натпревар се оддржа во основното училиште „Толи Зордумис“. Директорот на училиштето Бобан Ѓорѓиевски објасни дека натпреварот има два дела, вешто возење на велосипед, но и теоретски дел кој опфаќа тестови.
Звонко Димитријевски, секретар на Општинскиот совет за безбедност истакна дека учеството на полицијата помага овој натпревар да добие на тежина и да биде регуларен.
– Посебна комисија оценува вешто возење, а друга ги оценува тестовите, потенцира Димитријевски.
Организаторите информираат дека секоја година регионалниот натпревар се оддржува на различни места. Минатата година се одржа во Старо Нагоричане, а годинава во Липково. Најдобрите од регионалниот ќе учествуваат на државниот натпревар што годинава ќе се одржи на 25 мај во Скопје.