Четириесет единици крв беа собрани во денешната крводарителска акција во Кавадарци.
– Ова е нашата традиционална прва крводарителска акција според програмата за крводарување во оваа година. Годинава имаме план да собереме 1.194 крвни единици. Минатата година обезбедивме 1.960 единици крв и бележевме околу 160 процентно остварување на планот. Сигурни сме дека и оваа година ќе го надминеме планираното, рече Розе Илова, секретар на општинската организација на Црвен крст од Кавадарци.
Илова нагласи дека Кавадарци е на врвот по доброволно дарување крв во државата и се наоѓа меѓу десетте најдобри општини кога е во прашање хуманоста изразена преку крводарување.
Акцијата ја реализираше Црвениот крст Кавадарци во соработка со Институтот за трансфузиона медицина од Скопје.