Вкупно 38 случаи на заболени од грип се регистрирани од почетокот на сезоната на грип на подрачјето на општините Крива Паланка и Ранковце.
– Пријавувањето почнува од 40-та недела и трае до 52-та и од прва до дваесетта недела и опфаќа две календарски години, така што за 2016/17 година досега се регистрирани 38 случаи на заболени од грип и тие се пријавени во декември. Најголем број од нив, 32 лица се на возраст од 15 до 64 години, информира доктор Елена Крстевска од Подрачната единица на Хигиено-епидемиолошка служба на Центарот за јавно здравје – Крива Паланка.
Споредено со минатата сезона на пријавување, бројот на заболени од грип е помал.
– Во сезоната на грип 2015/16 биле регистрирани вкупно 52 лица, претежно на возраст од 15 до 64 години, а најмногу имало во февруари, 35 пријавени случаи. Според статистиките од изминатите години, се очекува оваа сезона која се уште трае, бројот на заболени од грип да расте во следните месеци, додаде Крстевска.