Повеќе од 60 крвни единици се собрани во акцијата за доброволно дарување крв меѓу жителите на општина Градско, а која денеска заеднички ја организираа Општинската организација на Црвениот крст од Велес и Институтот за трансфузиона медицина од Скопје.
Лилјана Пановска од Општинската организација на Црвениот крст од Велес изјави дека акцијата во Градско е втора по ред годинава и ја оценуваат како мошне успешна.
– Крводарителите од Градско и овојпат ја докажаа својата хуманост на дело, а имаше и млади кои првпат даруваа крв. Посебно сме им благодарни за нивната хуманост да спасат нечиј живот во опасност, потенцира Пановска.
Сите собрани крвни единици ќе бидат однесени во Институтот за трансфузиона медицина од Скопје, а од таму распределени за потребите на клиниките во Скопје и болниците низ државата.