Осум лица ангажира Општина Велес за лични и образовни асистенти на деца со попреченост во општинските основни училишта „Васил Главинов“ и „Блаже Конески“. Асистентните ќе им помогнат на децата полесно и подобро да ја совладаат наставната програма, но и полесно да се движат низ училиштето и да ги реализираат културно – хигиенските потреби.
– На барање на родители на деца со пречки во развојот и по консултација со релевантните институции, констатирано е дека овој вид услуга може да го подобри квалитетот на живот на поголем број граѓани на локално ниво, информира Родна Трајковска од Општина Велес.
Ангажирањето лица за помош на децата е дел од проектот „Заедно под исто сонце“ што, пак, е дел од програмата „Општинско-корисна работа“. Лицата ќе бидат ангажирани шест месеци, ќе добиваат месечен надоместок од 6.200 денари за 20 работни часа во неделата, со вклучен персонален данок, осигурување од несреќа при работа и професионално заболување, со што добиваат можност да стекнат нови работни вештини и работно искуство. Статусот на невработено лице останува непроменет и на невработените лица – корисници на социјална помош ќе им мирува остварувањето на ова право до истекот на работниот ангажман.
Доколку се добијат очекуваните резултати, Општината може и да предвиди финансиски средства во Буџетот за испорака на ваков вид социјална услуга од релевантни чинители.