Маршалот Тито, Александар Македонски, Бизмарк, Петар Велики, Карлос Слим, најбогатиот човек на светот, Атила Хунски се дел од личностите чии што биографии, Министерството за култура, ќе ги подготви за македонските граѓани.
Меѓу 150-те одбрани дела за превод се опфатени биографиите на комунистичките лидери како Тито и Хрушчов, речиси сите американски претседатели, па се’ до животните приказни на основачите на Твитер, на Амазон, на Битлси, Принцезата Грејс и на Агата Кристи.
Во конкурсот се наведени и книги за научници, писатели, режисери, музичари. Меѓу нив две книги за Пабло Неруда, а Владата ќе финасира и две книги за Јосип Броз Тито: „Тито и другарите од Јоже Пирјевец и „Јосип Броз Тито: Илустрирана биографија“ од Фицрој Меклин.
Се работи за вкупно 150 книги, за кои Министерството за култура ќе потроши речиси 1 милион евра или 57 милиони и 147 илјади денари.
Според податоците од Бирото за јавни набавки, оваа сума пари, државата ќе ја троши за издавачки и печатарски услуги, а во овие од 930 илјади евра не влегуваат и трошоците за превод на македонски јазик. Според објавениот конкурс книгите ќе се издаваат во текот на три години.
Инаку, Министерството за култура издава и книги за македонски историски личности, во едицијата „Македонски искушенија“.
A. Б.
.