Зошто се забранува снимање на седницата на Уставниот суд и дали тоа претставува нејзино затворање за јавноста, прашаа новинарите на почетокот на денешната седница на Уставниот суд, откако судот донел одлука единствено новинарите да можат да присуствуваат, но не и снимателите.
Претседателката на Уставниот суд Елена Гошева ги отфрли обвинувањата дека затворањето на седницата за сниматели претставува нивно бркање.
– Тоа вие така мислите. Ние сакаме да работиме во атмосфера во која ќе нема никакви пречки. Сакаме во текот на дебатата да работиме мирно. На снимателите им е дозволено да снимаат инсерти на самиот почеток – изјави Гешова.
Таа секак избегна да одговори на прашањето дали ваквата одлука на судот е донесена колективно или пак индивидуално.
Новинарите револтирано ја напуштија седницата, велејќи дека без снимки и тонски парчиња од седницата, тие не можат да работат.
Ова е втор пат како Уставниот суд не дозволува снимање. Претходно и новинарите и снимателите без никаков проблем присуствуваа на седниците.
Петар Клинчарски