Родителите и семејствата на жртвите од кочанската трагедија во дискотеката „Пулс“ денеска повторно одржаа „Марш на ангелите“ и повторно повикаа на целосна правда и побараа институциите да ги гонат сите што имаат одговорност на трагедијаата. Рекоа дека се гневни затоа што уште нема обвинение за полициајците и затоа што, како што тврдат, има уште лица кои имаат вина, а не се опфатени со постапката,
Пред полициската станица во Кочани се обрати Александар Наунов, кој упати остри пораки до институциите и побара проширување на истрагата и утврдување на одговорноста.
„Не сме овде од навика или од инает. Нашата болка не поминува со времето, но уште поболно е што правдата доцни, институциите молчат, а некој очекува ние да се умориме“, истакна Наунов.
Тој нагласи дека семејствата се гневни затоа што и по значителен период од трагедијата, службени лица од МВР кои по закон имале јасна обврска да постапат, сè уште не се обвинети.
„Гневни сме и затоа што постојат други лица за кои јавноста, а и ние како семејства, основано знаеме дека носат вина, а не се ниту осомничени, ниту пак предмет на видлива и транспарентна истрага“, рече тој.
Обраќајќи се до Основното јавно обвинителство и до Министерството за внатрешни работи, Наунов потсети дека и непостапувањето по службена должност, особено кога последицата е смртна, претставува кривично дело.
„Законот мора да важи за сите. И за униформата и за функцијата. Тие не смеат да бидат штит од одговорност. Селективната правда не е правда. Молкот не е неутрален. Одолговлекувањето не е случајно“, порача тој.
Родителите побараа проширување на истрагата, утврдување на индивидуална одговорност и јавно образложение зошто одредени лица не се опфатени со постапката.
„Ние не бараме одмазда. Бараме само она што му следува на секое човечко суштество – право на живот и безбедност. Нашите деца не се бројка. Тие имаат имиња, имаат приказни“, нагласи Наунов.
Тој истакна дека маршот е порака дека семејствата нема да молчат и нема да дозволат вистината да биде закопана заедно со нивните деца.
„Правдата што доцни е неправда, а неправдата за 63 изгубени животи е недозволива“, заврши тој.