Во пресрет на Новогодишните и Божикните празници општина Велес ја украси главната новогодишна елка во Младинскиот парк, постави уште три светлечки елки на три локации во градот, а со светлечка завеса е осветлена и Саат кулата што е симбол на Велес.
Како што информираат од Општина Велес, во рамки на активностите, оспособени се светилките на главната улица „Благој Ѓорев“ и поставени се висечки украсни елементи во централното градско подрачје.
Општина Велес постави светлечко црево на мостот „Гемиџии“ и светлечки лампиони на древните јавори на плоштадот С’рмаале.
Градската саат кула е обвиена со светлечка завеса во висина од десет метри. Влезот на градот по должина на улицата „Димитар Влахов“ е украсен со украсни елементи поставени на металните столбови за улично осветлување.
Од општината нема најава за организиран дочек на нова година на отворено. Последниот дочек за граѓаните на Велес на отворено беше во 2013 година.