Вечерва започнува една од најзначајните културни манифестации во Република Македонија, 52-то „Охридско лето“.
На Античкито театар, фестивалот ќе го отвори премиерата на театарскиот ораториум „Ромео и Јулија“ од Вилијам Шекспир, во режија на Дејан Пројковски.
Претставата ги обединува Битолскиот и Охридскиот театар, театарот „Вера Комисаржевскаја“ од Русија и Македонската опера и балет.
Фестивалот за отворен ќе го прогласи претседателот на Република Македонија, Ѓорѓе Иванов.
52-то издание, според организаторот, ќе понуди исклучително богата уметничка програма со настани кои се очекува да предизвикаат огромен интерес во јавноста и посебно кај љубителите на музичката, театарската и друг вид уметности.
Над 500 уметници ќе бидат дел од драмската понуда. На Античкиот театар, во предворјето на црквата „Света Софија“, на Долни Сарај, во Заливот на коските, и на други атрактивни локаци ќе бидат прикажани десет театарски претстави на седум различни јазици. Во музичката програма за 52-рото издание на „Охридско лето“ се предвидени вкупно 25 концерти со учество на уметници од повеќе земји од Европа и светот, како Русија, Италија, Франција, Германија, Кипар, Полска, Чешка, Шпанија, Доминиканска Република, Јужна Кореја, Словенија, Хрватска, Албанија, Бугарија и други.
Во изминативе години, Фестивалот „Охридско Лето“ успеа да го одржи и чекорот со европските и светските културни текови и се вброи во елитата на најголемите и најзначајни Фестивали во светот.