Советот на општина Демир Хисар го усвои буџетот на општината предложен од градоначалникот Марјанче Стојановски за претстојната 2018 година.
Од општина Демир Хисар информираат дека локалниот буџет за 2018 година е проектиран на вкупен износ од 171.449 милиони денари.
Планирани приходи од кои ќе се финансираат расходите на општина Демир Хисар се даночни приходи 16.3 милиони денари, неданочни приходи 5.1 милиони денари, капитални приходи 4.7 милиони денари, приходи од дотации 72.5 милиони денари, приходи од трансфери 56.6 милиони денари и приходи од донации 4.4 милиони денари.
-Приходите на буџетот за 2018 година се планирани согласно трендот на наплата во изминатите години и согласно насоките од Министерството за финансии на Република Македонија за дотациите. Вкупните расходи на општина Демир Хисар за 2018 година се планирани на вкупен износ од 171.449 милиони денари, а само за капитални инвестиции планирани се 52.3 милиони денари додека за социјални бенефиции издвоени се 500.000 денари. Од структурата на планираните расходи се констатира дека со планираните расходи утврдена е значајна развојна компонента бидејќи капиталните расходи опфаќаат над 30 насто од структурата на вкупните расходи, информираат од тамошната локална самоуправа.