Владата им подари нафта за горење на 71 македонска општина од задолжителните нафтени резерви за греење во училиштата за претстојната зима, јави телевизија „Алфа“.
Вкупната количина изнесува 1.455.000 литри екстра лесно масло за горење, која во малопродажба чини околу 1,5 милиони евра. Според податоците во Службен весник, најголем дел од општините добиваат од 5.000 до 30.000 литри нафта.
Владата донела одлука Битола, Куманово и Тетово да добијат по 100.000 литри екстра лесно масло за горење, Велес, Охрид, Прилеп, Струга и Штип по 60.000, додека Струмица 50.000 литри. Трошоците за транспорт паѓаат на товар на општините.
Мерката, доаѓа по апелот на Градоначалниците до Владата- да седнат на заедничка маса за да го решат проблемот со големите долгови на локалните самоуправи поврзани со образованието. Последните пресметки на општините покажаа дека тие изнесуваат 25 милиони евра, поради што под знак прашање беше греењето во дел од училиштата.