Приведена е 53-годишна струмичанка, осомничена за лихварство.
Според информациите од полицијата, Ј.Т. во јуни минатата година му позајмила 2.700 евра на жител од струмичко село, но потоа од него побарувала да врати дури 15.000 евра.
Вчера, оштетениот се сретнал со неа за да ѝ исплати 100 евра, износ кој таа го определила како месечна камата. Во моментот кога ѝ ја предал однапред обележаната банкнота, полицијата ја лишила од слобода.
При прегледот кај неа биле пронајдени обележаните пари, како и тетратки и листови со евиденција за дадени позајмици и камати.
Со судска наредба бил извршен и претрес во нејзиниот дом, при што биле одземени пари во денари и евра, нотарски акти, како и дополнителна документација која укажува дека во повеќе наврати давала пари со високи камати, стекнувајќи противправна имотна корист.
Осомничената е задржана во полициска станица, а за случајот е известен јавен обвинител. По негово целосно расчистување, против неа ќе биде поднесена кривична пријава за „лихварство“ по член 260 од Кривичниот законик.