Четири години по ред укажуваме за неправилностите и несериозноста во раководењето со Детската Градинка „Јасна Ристеска“. Најстрашно е што самоволието во управувањето и раководењето на оваа јавна установа е на штета на родителите, воспитнообразовниот процес, а најмногу на децата, вели Ѓоко Танасоски, член на Извршен Одбор на СДСМ.
Реконструкцијата на централниот објект од градинката, за којашто неколку пати досега алармиравме и баравме извештај а којашто пред неколку месеци требаше да биде готова, се уште не е завршена.
Со месеци децата од оваа градинка се преместувани во други објекти и згрижувани во групи со голем број деца, несоодветно на пропишаните стандарди.
Од друга страна пак, партиципација се наплаќа еден месец одапред а воспитувачките се приморани да не ги примаат децата до исплаќање на обврските.
Директорката на оваа установа, кадар на ВМРО-ДПМНЕ, на родителите им наметнува и дополнителни трошоци за литература којашто е спротивна на Законот за детска заштита.
Оваа задолжителна литература којашто им се наметнува на децата е во издание на издавачката куќа ЕДУКА МАК.
Директорката, како и членови на нејзиното семејство работат како автори, коавтори, рецензенти за оваа издавачка куќа.
Додека Никола Груевски како и секогаш пред избори, безобразно лаже за градинките, досегашниот молк на институциите за овие неправилности покажува сериозен недостаток на совест и грижа за најмладите.
Предупредуваме, по промената на власта на 11 Декември, ќе биде направена целосна ревизија на работењето на градинката и секој којшто го прекршил законот ќе одговара.