Контролата на власта преку Агенцијата за радиодифузија ќе ја зголеми цензурата во медиумите. Печатените и интернет медиумите да се изземат од законот, бидејќи релугацијата на сите медиуми во еден закон ќе претставува опасност од недоследности – се вели во забелешките на Советот на Европа за нацрт – законот за медиуми.
Во анализата на Советот на Европа има забелешки во речиси секое поглавје на законот во сите 130 страни.
Во однос на прашањето за Агенцијата за радиодифузија, која треба да врши регулација на медиумите, СЕ предлага членовите во советот да се бираат со двотретинско мнозинство во Собранието, бидејќи владејачката партија ќе има доминантно влијание преку номинирањето членови од страна на Комисијата за избори и именувања и назначувањето на кандидатите во Парламентот затоа што и на двете места им е потребно просто мнозинство. Затоа е потребно да се зголеми бројот на членови кои ќе ги предлага невладиниот сектор.
Воедно, дефинирањето на новинарот за Советот на Европа е неприфатливо во формата во која е дадено во предлог – законот.
Инаку денеска, по завршувањето на јавната расправа за нацрт – закон за медиуми организирана од Министерството за информатичко општество, министерот Иво Ивановски изјави дека до вечерва ќе се објави нова нацрт – верзија на законот со вградени измени, поради забелешките што пристигнуваат од сите страни. Новата нацрт – верзија ќе биде објавена на веб – страницата на Единствениот национален електроснки регистер на прописи.