Светскиот Македонски конгрес, се огласи по последниот инцидент со интонирање на албанската химна во училиште во Џепчиште.
СМК бара од Владата и Министерството за образование во сите предшколски установи и основни и средни училишта да постават јарболи со македонското државно знаме и да ја прекинат праксата за неинтонирање на македонската национална химна во воспитно-образовните установи.
СМК бара во сите предшколски установи и основни и средни училишта да се интонира македонската национална химна, бидејќи , велат, така се учи да се сака татковината, да се почитува државното знаме и да се пее националната химна.
„За СМК неприфатливо е интонирањето на химната на Република Албанија во државното основно училиште во тетовското село Џепчиште, на почетокот на новата школска година. Независно што албанскиот е наставен јазик, тоа училиште се наоѓа на територијата на Македонија и нема право наставата да ја изведува на начин спротивен на Уставот и законите“, велат од СМК.
Со провокации и непочитување на Уставот и Законот не се градат мерки на меѓусебна доверба, толеранција и коегзистенција во општеството и државата, укажуваат од Светскиот македонски конгрес.