Вината зошто Југохром толку долго време го загадуваше воздухот, но и зошто работниците од Југохром и покрај се останаа без работа, треба да ја сноси власта и никој друг, обвини денеска Пеце Мирчевски, претседател на Комисијата за животна средина на СДСМ и член на Извршниот одбор на СДСМ.
– Правејќи се дека решава еден проблем, власта успеа да направи нов. 720 вработени сега се во неизвесност за своите работни места и за својата плата со која ги прехрануваат семејствата. Не е познато кога и дали ќе се вратат на работа, вели Мишрчевски.
Според него власта мора да даде одговор кој и зошто ја кочел постапката за Југохром и веднаш да помогне во изнаоѓање решение за вработените.
Порача дека СДСМ има план за решавање на проблемот со загадувањето. Во планот, меѓу другите мерки вклучена е и можноста за добивање поволни кредити за фирмите, за да можат да постават филтри и да ги почитуваат сите еколошки стандарди.
