Социјалдемократскиот сојуз на Македонија бара Регулаторната комисија за енергетика да ги повлече донесениот правилник и тарифниците за цената на струјата и парното греење.
Поскапувањето на струјата од 10 отсто втор пат оваа година, неизбежно ќе биде силен удар врз граѓаните и фирмите, а заедно со поскапувањето и на бензините директно ќе влијае на зголемување на цените на храната и останатите основни производи неопходни за да се преживее, рече на денешната прес-конференција Зоран Јовановски, потпретседател на СДСМ.
Од партијата реагираат и на укинувањето на дневната евтина тарифа на струјата која важеше од 13 до 16 часот.
Ја повикуваме ВМРО-ДПМНЕ да не се оправдува со наводната независност на комисијата и јавно да се приклучи кон барањето на СДСМ. Доколку нашиот апел не биде прифатен, најавуваме дека ќе ги искористиме сите расположливи демократски мерки, додаде Јовановски.
