Министерот за образование и наука Спиро Ристовски денеска изјави дека малата Александра Бошњаковска, по која до синоќа се трагаше, ќе може да го продолжи своето школување во второ одделение.
– Стапивме во контакт со училиштето каде што учело девојчето и тоа ќе го продолжи својот образовен процес во второ одделение. Сето она што девојчето го има пропуштено во првото одделение ќе биде надоместено преку посебна работа со наставник за девојчето да може целосно да се вклопи, изјави Ристовски.
Полицијата во такси-возило доцна синоќа кај Маврови Анови ја пронајде малата Александра со својата баба Снежана. Претходно полицијата имала сознанија дека девојчето се наоѓа во Македонски Брод.
Поднесена е кривична пријава против С.Б.(41), А.Б.(66), С.Б.(64) и М.Б.(38), сите од Скопје, за сторени две кривични дела „одземање на малолетник“ и „запуштање и малтретирање на малолетно лице“.
Во јули 2011 година, додека Т.Б., инаку поранешна сопруга на С.Б., била во Србија со нивната малолетна ќерка, дошле таткото на С.Б., А.Б. и неговиот брат М.Б. и со употреба на физичка сила и закана по живот ја одзеле нејзината малолетна ќерка и ја донеле во Македонија. По ова, мајката на С.Б., заедно со останатите членови, го криеле девојчето на различни локации во Скопје, постапувајќи спротивно на правосилната судска пресуда со која девојчето и било доделено на Т.Б.