Министерот за образование и наука Панче Кралев и ректорот на Универзитетот „Гоце Делчев“-Штип Саша Митрев денеска го пуштија во употреба Центарот за рекреација и физиотерапија.
Кралев рече дека современата опрема инсталирана во центарот ќе го подобри квалитетот на практичната настава за студентите на додипломски и постдипломски студии на отсекот физиотерапија на Медицинскиот факултет во Штип, а ќе биде достапна и за сите заинтересирани граѓани.
– Со инвестиција од над шест милиони денари, Универзитетот „Гоце Делчев“ демонстрира дека и во иднина ќе може да вложи во ваков тип лабаротории и центри за практична настава, рече Кралев, додавајќи дека преку проектот на Владата на Штипскиот универзитет се инсталирани и други видови лабаротории, кои дополнително ќе бидат промовирани.
Ректорот Митрев истакна дека отсекот за физиотерапевти е меѓу најатрактивните на Медицинскиот факултет во Штип, со 300 студенти, од кои 30 се од странство.