Со средства во висина од над еден ипол милион денари ќе се изврши реконструкција на покривот на подрачното основно училиште „Страшо Пинџур“ во Чешиново.
Со реконструкцијата се планира целосна замена на старите керамиди на околу 1000 метри квадратни, како и на дрвената конструкција од покривот, громобранската инсталација и на олуците. Ќе биде поставена и термоизолација.
Изведувач на работите ќе биде компанијата „Тонко СР“ од Кочани, а градежните активности се планира да завршат до почетокот на новата учебна година.
Со новите градежни зафати ќе се докомплетира енергетската ефикасност на училишниот објект, на кој пред пет години се изврши реновирање на фасадата, замена на прозорците и вратите и се воведе парно греење. Средствата за реконструкцијата тогаш беа обезбедени од страна на Општината Чешиново-Облешево преку ГЕФ проектот на Светската банка, како и од донација на Полската амбасада во Македонија.