„Министерството за образование и наука реагира на соопштението на општина Центар во врска со случувањата во основното училиште “Св. Кирил и Методиј“ кое изминатите 4 години работи согласно ИБ програмата, престижна меѓународна наставна методологија која за жал, поединци од менаџментот и наставниот кадар на училиштето, силно поддржани од структури на локалната самоуправа и советот на општината се обидуваат да ја укинат наводно поради незадоволителен квалитет, притоа обидувајќи се целата ситуација да ја претстават како волја на родителите на учениците и на мнозинството наставници, за што не постојат никакви факти и докази.
Вистината е дека ИБ претставува привилегија за секое училиште. Станува збор за програма со силен фокус и стимулација на учениците да истражуваат, да бидат повеќе креативни, критички да размислуваат и да стекнуваат трајни вештини, знаења и познавања на областите кои ги изучуваат. Таа го заменува класичниот начин на предавање на табла, а акцентот е ставен на повеќе интерактивна и практична настава. Програмата е поддржана од наставниците, родителите и учениците и дава исклучително позитивни резултати кај нас, исто како и во сите останати 145 земји и 3.500 училишта каде што се применува.
Особено мора да се потенцира дека ИБ програмата во училиштето “Св. Кирил и Методиј“ е воведена во 2013 година на барање на училишниот одбор. Тоа е истото тело, кое сега, по назначувањето на нов директор од страна на градоначалникот на општина Центар, покренува иницијатива за нејзино укинување, иако во изминатите 4 години, неговите членови ги изготвувале годишните програми за работа на училиштето, кои предвидувале континуитет во ИБ наставата и конечно поднесување акредитација за стекнување на статусот светско ИБ училиште.
Училишниот одбор пред само неколку месеци, практично пред почетокот на учебната година ја изработил и усвои новата програма за работа на училиштето за учебната 2016/2017 година во која исто така се гарантира континуитет на ИБ токму поради исклучителниот квалитет, за што согласност дал и Советот на општина Центар, а сега со иницијативата за нејзино укинување, всушност потврдува дека ги изманипулирал родителите кои ги запишале своите деца во ова училиште токму поради оваа програма. Кроењето на туѓи судбини е недозволиво и токму затоа, револтот на родителите е голем и целосно оправдан.
Без да навлегуваме во причините за менување на ставот кон имплементирањето, факт е дека одлуката да се укине ИБ програмата е целосно спротивна од најдобриот интерес на учениците во ова училиште и го нарушува континуитетот во едукацијата согласно досегашниот модерен концепт на настава и совладување на материјата. Но, ова не е прв пат во училиштата во општина Центар да има сценирани настани, кои ги вознемируваат и дефокусираат учениците од основната цел поради која го посетуваат училиштето и создаваат раздор меѓу нивните родители и меѓу наставниците. Министерството за образование и наука и овој пат, ќе ги преземе и примени сите неопходни правни механизми и мерки во насока на заштита на учениците и непречена реализација на воспитно образовниот процес“ стои во реакцијата од Министерството за образование и наука.