Во сите пет објекти на детската градинка „Буба Мара“ во општина Аеродром се реализираше едукативна работилница „Препознавање конфликти и конфликтна ситуација и начини на решавање“.
Неколкудневната работилница, како што информира општина Аеродром, вклучи над 170 деца на возраст од пет до шест години.
– Целта на оваа работилница е да ги насочи дечињата како да ги препознаваат негативните форми на однесување, како и позитивното чувство по решениот конфликт, соопшти општина Аеродром.
Децата учеле и за култура на однесување, развивање емпатија, толеранција со своите врсници, почитување на различностите, стекнување социјални и комуникациски компетенции, поттикнување позитивни емоции, самоконтрола на реакции и соработка со другите деца.
Активностите во работилницата се одвивале во неколку фази: препознавање низ цртани филмови, слики, глума и преку цртање заеднички цртежи.
Работилницата е во рамки на програмата на советувалиштето за деца и родители „Мал свет, големи срца“.