Институтот за педагогија при Филозофскиот факултет во Скопје вечер ќе го промовира првиот број од Меѓународното списание за образование, истражување и обука (International Journal forEducation, Research and Training – IJERT).
Ова е единствено списание од ваков карактер во Македонија кое ги третира современите образовни текови, трендови и предизвици од глобален аспект и дава особен придонес во креирањето на образовните политики на нашата земја и пошироко.
Во уредувачкиот одбор на списанието има 34 членови, од кои 25 членови од одборот се странци, односно професори и претставници на 22 познати универзитети од 14 различни земји, од кои поголемиот дел се земји членки на Европската унија, но имаме претставници и од универзитети од Русија и САД.
На промоцијата ќе се обратат деканот на Филозофскиот факултет во Скопје Горан Ајдински, раководителот на Институтот за педагогија Анета Баракоска, главниот и одговорен уредник Борче Костов и уредниците Елизабета Томевска-Илиевска, Алма Тасевска и Елена Ризова.
Меѓународно списание за образование, истражување и обука излезе од печат во јуни оваа година, а во исто време и неговата електронска верзија која е прикачена на веб страницата на Филозофскиот факултет. Како и сите списанија кои ги издава Филозофскиот факултет и ова списание е со отворен пристап.
Во првиот број од списанието публикувани се трудови кои се однесуваа на реформите кои се превземаат во воспитно-образовните системи. Големиот број на трудови кои пристигнаа за објава, како и севкупноста на темите кои беа обработени, укажуваат на множество на проблеми од областа на образованието.