Градоначалникот Тони Тоневски информира дека овој проект ќе се реализира со средства од Фондовите на ЕУ, односно од Програмата за меѓугранична соработка меѓу Македонија и Бугарија. Партнер во проектот им е општина Рила од Бугарија, а за реконструкција на објектот се обезбедени 158.000 евра.
– Со проектот е опфатена целосна реконструкција на покривот на оваа зграда, поставување комплетно нови врати и прозорци, изградба на фасада, енергетски ефикасна, а ќе се постават и сончеви колектори, кои што ќе се користат за загревање на водата. Со овој проект ќе создадеме предуслови за втората фаза, а тоа е внатрешно уредување, рече Тоневски.
Откако ќе заврши реконструкцијата и уредувањето на канцелариите, општинската администрација од сите одделенија и едношалтерскиот систем ќе се всели во овој објект.
– Сега навистина имаме проблем со канцелариите кои се во сопственост на општина Пробиштип, односно се во две згради и во едната зграда се присутни повеќе министерства, со што ја отежнуваме услугата која што ја нудиме кон граѓаните, односно ги шетаме од една во друга зграда, а овде е сосема соодветна зграда, рече Тоневски.
Тој истакна дека вработените од Домот на културата ќе бидат сместени во новата зграда на кино салата и додаде дека нивната дејност одговара да бидат во овој објект.