Балканскиот институт за вера и култура по третпат во Македонија ја организира програмата Oxford Connections што овозможува директни средби на академици, професори, научници, студенти и други интелектуалци и размена на идеи со претставници од Универзитетот Оксфорд.
Програмата официјално ќе биде отворена денеска на Тетовскиот универзитет – филозофија на религија, на тема „Може ли верувањето во Бог да биде рационално во отсуство на докази?”, каде ќе предава докторантот Макс Бејкер-Хич, а попладне во Американското катче предавање ќе одржат Грејс Маура и Скот Ејблс.
– Се надеваме дека преку програмата ќе направиме скромен придонес кон јавната сфера на општество зголемувајќи ги можностите на сите оние со потенцијал и капацитет за врвен дострел во нивниот академски развој. Нашата визија е интелектуалците да се поттикнат да ги понудат своите вештини и знаење кон подобрувањето на благосостојбата на сите што живеат во Македонија, изјави д-р Костаке Милков, претседател на Балканскиот институт за вера и култура.
Организаторот како главен настан го издвојува Веритас форумот кој ќе се одржи во Младинскиот културен центар-Скопје во четврток од 19 часот, со познатиот професор д-р Ендрју Бригс, кој ќе говори на темата „Нанотехнологијата, верата и другите невидливи работи“.
Третата програма Oxford Connections ќе се одржува на различни локации во Тетово и во Скопје, а ќе заврши идниот понеделник со прослава за вториот роденден на Балканскиот институт за вера и култура. Oxford Connections е дел од иницијативите на Институтот чија цел е да ги поврзе релевантните установи во Македонија со Оксфордскиот универзитет, кој е меѓу водечките високообразовни институции во светот.