Претставниците на четирите политички партии, потписнички на Договорот во Пржино, постигнаа договор. Решено е прашањето за надлежностите на министерот за внатрешни работи, а потврдена била и посветеноста на партиите за законот за специјално обвинителство доколку Уставниот суд одлучи против делови или целиот закон, соопшти американскиот амбасадор Џес Бејли.
Според договореното, новиот министер за внатрешни работи ќе има право да донесе 15 кадровски измени. Примената на Законот за внатрешни работи и надлежностите на министерот за внатрешни работи се одложува до 1 јануари 2017.
Изборниот датум се’ уште не е прецизиран, но според Бејли партиите ги усогласиле ставовите за прочистувањето на избирачкиот список, за балансирано известување на медиумите, за формирање преодна влада на 100 дена пред изборите.
„Се надеваме дека со овој договор ќе се постави патот до изборите кои ќе бидат прифатени од сите страни “, изјави амбасадорот на САД Џес Бејли.
Политичките лидери ќе се сретнат до 31 август годинава за да ја проверат имплементацијата на овој договор, и да донесат конечна одлука и да преземат обврска за датумот на изборите. Четирите партии ја повторија и посветеноста во имплеминтирањето на итните реформски приоритети на Европската унија, Охридскиот рамковен договор и за продолжувањето на евроатлантската интеграција на Република Македонија.
Исто така се договорија да ја потврдат својата посветеност за законот за специјален обвинител доколку Уставниот суд одлучи против сето или делови од законодавството кое ја создаде оваа важна институција, рече Бејли.