По кусо боледување вчера почина Драгиша Димитријевски – Шипе, актер од Кумановскиот театар.
Димитријевски е роден во Куманово на 6 април 1956 година. Својата актерска кариера ја започнува со претставата „Мајка храброст и нејзините деца“ во 1974 година, а во 1979 година, дипломира на Факултетот за драмски уметности во Скопје, во класата на проф. Тодорка Кондова. Од 1980 годинае постојан член на Кумановскиот театар, каде што остварува над сто и педесет актерски улоги.
Освен по своите бројни актерски улоги, Драгиша Димитријевски – Шипе и е познат на јавноста и како ликовен уметник со плодно творештво. Добитник е на стручни и општествени награди, на МТФ „Војдан Чернодрински“, на „Ноемвриска награда“ на градот Куманово и од Друштвото на ликовни уметници – Куманово. Своевремено ја доби и наградата за млад ликовен автор. Во последните неколку години Димитријевски е уметнички раководител на ликовната колонија „Карпино“.
Погребот ќе се изврши денеска во 15 часот на градските гробишта во Куманово, а утре со почеток во 12 часот во Кумановскиот театар ќе биде одржана комеморација во негова чест.