Педагошкиот факултет-Битола објави конкурс за запишување кандидати за педагошко-психолошка и методска подготовка или педагошка доквалификација на лица кои се стекнале со високо образование на ненаставна група на наставнички студии, односно студии кои немаат наставна насока.
Педагошко-психолошката и методска подготовка ќе се организира во траење од еден семестар, и по завршувањето на подготовката, кандидатите се здобиваат со 30 кредити според Европскиот кредит трансфер систем, информираат од Педагошкиот факултет при Универзитетот „Св.Климент Охридски“-Битола.
Според Правилникот за начинот и условите на следењето на наставата и полагањето на испитите за стекнување на педагошко-психолошка и методска подготовка, покрај полагањето на предвидените задолжителни и изборни предмети, кандидатите изведуваат најмалку 45 дена практична настава во училиште.
Трошоците за педагошка квалификација изнесуваат 250 евра, а пријавувањето на кандидатите завршува на 24 октомври, посочуваат од Педагошкиот факултет во Битола.