Поради маглата во скопската котлина и попладневно поголемиот дел од предвидените летови на аеродромот „Александар Велики“ се откажани. Откажани се слетувањата од Истанбул, Цирих, Братислава и Малме, како и полетувањата за Белград, Истанбул, Цирих и Малме.
Според податоците од веб страната на концесионерот на аеродромот ТАВ Македонија откажан е летот од Виена на полноќ и полетувањето кон Виена за утре наутро.
И сообраќајот по државните патишта се одвива со намалена видливост од маглата од 50 до 100 метри на патниот правец Скопје – Миладиновци, додека видливоста на патниот правец Скопје-Катланово е од 100 до 150 метри.
Сообраќајот на државните патишта се одвива во зимски услови, по наместа влажни коловози.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е почеста појава на одрони, особено на патните правци: Кочани -Мак. Каменица – Делчево, Виница – Берово, Гостивар – Стража, Маврово – Дебар – Струга, Д. Капија – Удово, Катланово – Велес, Крушево – Демир Хисар и Ресен – Буково.
Интензитетот на сообраќај на патните правци надвор од градските средини е умерен, а на граничниот премин Дојран поради зголемена фреквенција има задржувања околу половина до еден час. На останатите граничните премини, освен на граничниот премин Богородица, кој е затворен за сообраќај поради блокада на грчките земјоделци на Евзони, нема подолги задржувања за влез и за излез од државата.