Четириесетгодишен осуденик од Скопје, кој издржувал затворска казна во Казнено-поправната установа Затвор Штип, е пронајден починат во својата соба, информираат од Секторот за внатрешни работи Штип при МВР.
Случајот бил пријавен во полиција вчера во 10:35 часот од страна на затворската управа. На местото на настанот пристигнала екипа на Итната медицинска помош, при што лекар констатирал смрт, а на телото на починатиот не биле забележани видливи траги на насилство.
„Вчера во 10:35 часот во СВР Штип од КПУ – Затвор Штип е пријавено дека во соба во установата е пронајден починат осуденикот В.М. (40) од Скопје“, соопштуваат од полицијата.
По насоки на јавен обвинител, телото на починатиот е предадено на обдукција, со цел да се утврдат причините за смртта.