На плоштадот „Македонија“ вечер од 18 до 23 часот ќе се случува „Ноќ на истражувачи” во организација на Факултетот за деловна економија и организациски науки при Универзитетот „Американ колеџ“ од Скопје.
Манифестацијата ќе опфати настани за различни возрасни групи – за најмалите истражување на небото и планетите, разговори со научници за првиот робот, квиз за Европа и интерактивна игра за тинејџерите „Истражи ја Македонија – Потрага по богатство“, тестирање мириси, презентација на можности за стипендии и проекти и катче за забава каде што ќе може да се истражува, слика, да се изработуваат оригами, фигури од глина, да се видат необични хемиски експерименти…
Проектот „Ноќ на истражувачи“ е финансиран од Европската унија и е дел од Седмата рамковна програма „Марија Кири”.
– Целта на оваа активност е на забавен и интерактивен начин да ја доближиме науката до јавноста, како основен двигател на општествениот и економскиот развој. Организацијата ги помага истражувачите како индивидуи, се одржува четвртиот петок во септември во над 300 градови низ Европа, кога се организираат интересни и забавни активности преку кои се покажува колку е возбудлива науката и колку е присутна во секојдневниот живот, соопшти „Американ колеџ“.
Од 19.30 ќе има видеонатпревар за студенти, награди за најдобар научен постер и за најдобар есеј на тема „Науката е во тебе, љубопитноста е… насекаде. Кон европски развој!“, од 20.30 часот ќе почне претставата-пантомима „Љубопитни за Теоријата на Чарлс Дарвин“, а потоа „Ноќта на истражувачи“ ќе продолжи со музика и забава.