Во рамките на одбележувањето на 7 Септември, Денот на ослободување на Делчево и 8 Септември Денот на независноста на Македонија, општина Делчево ќе ги организира традиционалните културни манифестации „Пијанечки денови на сливата 2017“ и меѓународниот Фестивал за афоризам и карикатура.
Како што истакна на денешната прес- конференција Тони Стоименовски , советник за ЛЕР од Општина Делчево, со овие манифестации Општината сака да го промовира брендот- пијанечка слива и сите преработки и производи кои се атрактивни за населението од овој крај, но и да ја збогати самата манифестација со учеството на еминентни имиња од областа на афоризмот и карикатурата.
– Општина Делчево е подготвена за двете значајни манифестации кои по традиција се одржуваат во месецот септември. Утре започнуваме со оддавање почит и положување свежо цвеќе пред споменикот на Гоце Делчев и споменикот на Паднатите борци од НОБ, а во попладневните часови пред летната сцена на штандови ќе ги презентираме мајсториите на домаќинките во подготвување на најразлични специјалитети од сливите, но и печење на жолта сливова ракија по делчевски начин, рече Стоименовски.
Тој најави дека учество во овој дел од манифестацијата ќе земат локални бизнисмени кои се занимаваат со производство и преработки од сливите, сите училишта кои приготвуваат свои специјалитети, но и домаќинки кои на лице место ќе прават мармалад и слатко од сливи.
Манифестацијата „Пијанечки денови на сливата“ ќе биде збогатена со 6-то издание на Фестивалот за афоризам и карикатура.
– Годинава на овој фестивал ќе учествуваат еминентни имиња од областа на карикатурата и афоризмот. Подготвивме и изложба на карикатури од Миро Ѓеоргиевски, „Черчил низ карикатура“, но исто така, афористичарите и карикатуристите ќе имаат можност да им објаснат на учениците како се црта карикатура и се пишува афоризам, рече Стоименовски.
Во рамките на манифестацијата ,Делчево организира и изложба на фотографии од Делчево низ историјата, а во соработка со локалните угостители и бендови ќе се обидат да го вратат Делчево во минатото кога бил актуелен боемскиот живот и старото корзо. Манифестацијата започнува утре попладне во 17 часот.