Народната банка на Република Македонија подолг временски период презема чекори, согласно со своите развојни планови, за изградба на нов функционален објект којшто ќе ги задоволи сегашните и идните потреби на банката. Заради тоа, изготвивме проектна задача и објавивме анонимен конкурс за изработка на идејно решение за нов објект на Народната банка на Република Македонија.
Комисијата составена од девет члена, истакнати професионалци, професори и академици од областа на архитектурата, градежништвото и уметноста, заклучи дека: „трудовите коишто беа доставени не понудија објекти што се препознатливо архитектонски проектирани и дизајнирани со современи конструктивни системи. Во понудените решенија нема архитектура со еден похрабар концепт, современа технологија, богат колорит и материјали, ниту пак архитектура што ќе дава посебен дух и белег на плоштадот Македонија и на пошироката околина на центарот на Скопје. Понудените проекти, во однос на катастарската парцела на којашто треба да се изгради објектот, не дадоа решенија поврзани со барањата за сообраќај и пристап до објектот, заштита од пожари, безбедност и енергетска исплатливост.“
Имајќи го предвид наведеното, Народната банка на Република Македонија ќе ја врати доделената парцела и ќе побара нова којашто би била соодветна на нашите потреби.