Хуманитарната Фондација „Проф. др. Љупчо Ајдински“ додели парични награди и признанија со плакети и сертификати за хуманитарни активности на институции и поединци, како и на лица со инвалидитет.
Добитници на овие награди и признанија се деветгодишниот Јане Велковски, со тежок инвалидитет, за успешно интегрирање во редовниот образовен систем, Даниела Саздова, дефектолог, практичар за успешна хумана активност, Завод за рехабилитација на слух, говор и глас како успешна установа во рехабилитацијата, и ПОУ „Св. Климент Охридски“, Ново Село, Струмичко, како успешна установа во рехабилитацијата на лица со умерена и лесна психичка попреченост.
Наградени се и Анета Петровска и Анета Стефановска за најдобар дефектолог и голем хуманист, Живко Поповски – Цветин за создадени илјадници слики „Цвеќе на мирот“ со свои финансиски средства, доделени на високи светски и наши државници како и на голем број хумани лица во Републиката, Ване Марковски, новинар и водител на Канал 5 ТВ, за бројни хуманитарни емисии и за обезбедување и делење на храна на сиромашни семејства, како и Здружение на граѓани „Љубезност“ за обезбедување и делење на храна, секоја недела на бездомни лица.
Овие признанија и награди Хуманитарната Фондација ги доделува веќе седум години, на 28 април – роденденот на носителот на Фондацијата, универзитетски професор д-р Љупчо Ајдински, голем хуманист и филантроп, кој целиот свој живот го посветил во создавање кадри низ воспитно-образовниот систем и неговото општествено ангажирање.
Покрај ова, Фондацијата секоја година на 3 декември – Светскиот ден на инвалидитетот, доделува парични награди и стипендии на лица со инвалидитет, студенти – најдобри во генерацијата, со што проф. д-р Љупчо, кој годинава наврши 88 години, дава огромен придонес во развојот на хуманитарната дејност и за успешно интегрирање на децата со инвалидитет во образовниот систем во Македонија и пошироко.