Министерството за животна средина и просторно планирање и асоцијацијата „Ајде Македонија“ денеска организираат чистење на Националниот парк Маврово, во рамки на кампањата „Македонија без отпад” за чистење на националните паркови како природно и културно наследство од исклучителна вредност.
Чистењето во НП Маврово ќе се спроведе од 10 до 14 часот на локациите фудбалски терени во село Маврово, ски-патеки, крајбрежје на Мавровско Езеро до црквата во вода.
Викендот активности од оваа кампања имаше во националните паркови Галичица и Пелистер.Целта на кампањата е да се развие свест кај граѓаните за правилно управување со отпадот и да се развијат механизми за поддршка на граѓаните, општините и другите засегнати групи за подобро да се справат со неорганизираното и незаконско фрлање отпад во нивните заедници.
Во акцијата се вклучени управите на трите национални парка, општините Охрид, Ресен, Битола и Маврово-Ростуше, јавните комунални претпријатија, локалните здруженија на граѓани, туристичките и угостителски работници, планинари и алпинисти, Црвениот крст на Македонија, извидниците, колективните управувачи со отпад од пакување Пакомак и Еко клуб.