Раководството на „Медиа принт Макеоднија“ е изненадено од начинот на кој Владата реагираше на текстот за старите шпилхозни на Клиниката за гинекологија во Скопје, објавен во дневниот весник „Дневник“.
– Убеден сум дека ниту Дневник, ниту авторот на текстот немале намера да ги оспорат напорите кои ги прави државата за подобрување на состојбите во јавното здравство – вели претседателот на Управниот одбор на МПМ, Срѓан Керим, пренесува Телма.
Проф. д-р Керим ги отфрла владините обвинувања дека зад текстот за шпилхозните имало скриени мотиви да се привлечат повеќе пациенти во приватната клиника „Систина“, чиј крупен сопственик Орце Камчев е и еден од опствениците на МПМ.
Камчев, кој денеска присуствуваше на отворањето на ново продажно место на МПМ во центарот на Скопје, не сакаше да ги коментира обвинувањата на Владата упатени на негова адреса, известува Телма. Текстот со наслов „Старите шпилхозни ги налутија новите мајки – родилки“ беше објавен во понеделникот. Веднаш следуваше остра реакција од владината прес – служба, во која нападите кон Клиниката за гинекологија беа поврзани со бизнис интересите на Орце Камчев.