Во второто пријавување од првиот уписен рок во јавните средни училишта во 2013/2014 година, на 1-ви и 2 јули, се запишале 6.499 ученици и со нив вкупниот број запишани ученици во двете пријавувања во јунскиот рок е 16.999, информираше Министерството за образование и наука.
Од нив 11.963 ученици се за настава на македонски јазик, 4.698 за албански наставен јазик, 205 за турски јазик, 1 ученик за настава на српски и 132 повторувачи. Според видот на образование, 7.173 ученици се запишани во гимназиско образование, 9.394 во стручно, 251 во уметничко образование и 181 ученик во спортска гимназија.
Според информацијата на МОН, за вториот, августовски уписен рок, има 17.794 слободни места: 11.430 за настава на македонски јазик, 5.556 за албански, 747 за турски, 33 за настава на српски јазик и 28 слободни места за повторувачи.
Во гимназиите слободни се 4.794 места, во средните стручни училишта 12.826, во училиштата за уметничко образование има 157 слободни места и во спортската гимназија 17 (за ученици на македонски наставен јазик).
Вториот рок за пријавување и запишување ученици е на 22 август, а резултатите ќе бидат објавени наредниот ден.
Во учебната 2012/2013 година осмо одделение завршија 22.900 ученици, а со Конкурсот на МОН за запишување ученици во 2013/2014 се обезбедени околу 35.000 ученички места. Средното образование во Македонија е задолжително од 2008/2009 година.