Четири месеци има Универзитетот „Св.Кирил и Методиј“ да изготви национална стратегија за семејството, обврска што владата му ја даде на УКИМ.
– Во Македонија има тенденција на намалување на стапките на наталитетот и фертилитетот, на процентот на младата генерација, на бројот новозапишани во основни училишта. Овие податоци не се само бројки и гола статистика, туку предупредување дека е време нешто да се преземе – рече денеска ректорот на УКИМ Велимир Стојковски.
Министерот за образование Панче Кралев рече дека лично ќе придонесе за зголемување на наталитетот во Македонија.
– Цел на секој граѓанин, и моја, е стапување во брак и создавање семејство. Тоа е максималното нешто кое некој може да го оствари во живтотот – објасни Кралев.
Министерот за труд и социјална политика Спиро Ристовски рече дека намалувањето на наталитетот е проблем на модерното време со кој се соочува и Македонија.
– Само со целосно вклучување на севкупниот општествен потенцијал може да се избориме со овој сензитивен период во кој постојат тенденции за нарушување на семејните вредности и одржувањето на брачната заедница – рече тој.