Универзитетот за информатички науки и технологии „Св. Апостол Павле“ од Охрид и Универзитетот „Ангел Канчев“ од бугарскиот град Русе потпишаа Меморандум за соработка.
Склучениот Меморандум предвидува поддршка и трансфер на искуства околу воспоставувањето на соодветна институционална рамка за соработка помеѓу универзитетот и индустријата, заеднички настап и студиска размена во рамките на Програмата „Еразмус+“, како и поддршка при зачленувањето на Универзитетот за информатички науки и технологии „Свети Апостол Павле“ Охрид во меѓународни асоцијации на универзитети.
Ректорот на Универзитетот „Свети Апостол Павле“ Нинослав Марина по повод договорената соработка појасни дека се договорени конкретни активности на повеќе полиња, со лична оценка дека од најголемо значење за охридската високообразовна институција ќе биде споделувањето искуства во насока на основање на Центар за развој на иновации, технологии и претприемништво во рамките на новиот кампус на УИНТ што треба да претставува врска помеѓу потребите на стопанството и активностите на универзитетот во насока на поддршка на економскиот развој.