Универзитетот „Св. Кирил и Методиј“ во Скопје по повод 1.150 години од Моравската мисија и од словенската писменост, организира Меѓународен научен собир на тема „Кирилометодиевската традиција и македонско-руските духовни и културни врски“.
На научниот собир што ќе се одржи денеска и утре во Конгресниот центар на Универзитетот „Св. Кирил и Методиј“, во Охрид, на отворањето ќе се обратат министерот за образование и наука Спиро Ристовски, поглаварот на Македонската православна црква архиепископот охридски и македонски г.г. Стефан и ректорот на УКИМ проф. д-р Велимир Стојковски. Како што е најавено, ќе учествуваат универзитетски професори и научни истражувачи од Република Македонија и од Руската Федерација.
Темите на рефератите на учесниците се посветени на кирилометодиевската проблематика во контекст на македонско-руските духовни и културни врски од периодот на средновековието, преродбата и современите состојби, како и на општите духовни, културни, книжевни или писмени процеси што ја третираат македонската или руската традиција.