На предлог од Кинотека на Македонија, министерството за култура денеска го прогласи познатиот македонски и светски режисер Милчо Манчевски за Национален уметник.
Од 2012 година па до крајот на животот, секој месец Манчевски ќе добива финансиски надомест од 60 илјади денари од државата.
Министерката Канческа-Милевска рече дека тој ги исполнува критериумите утврдени со Законот за Национален уметник затоа што целокупниот негов ангажман е промоција на Македонија и македонското филмско творештво не само кај нас туку и насекаде во светот.
Оваа титула согласно Законот ќе му биде доделена на 8 Септември од претседателот на Република Македонија, Ѓорѓе Иванов.
Министерката за култура додаде дека критериумите за титулата Национален уметник не се строги и не се неостварливи:
„Навистина ми е драго што годинава Манчевски е добитник на оваа титула“, изјави таа.