Амбасадата на Република Македонија во Варшава учествуваше на Осмиот меѓународен хуманитарен базар во Варшава, организиран од СХОМ – Здружението на сопружници на шефовите на мисии.
На штандот од Република Македонија имаше препознатливи производи – македонско вино, кашкавал, ајвар, чаеви, кондиторски производи и детска козметика од македонски компании.
Како што информира вршителот на работи во македонската Амбасада во Полска, Горица Атанасова-Ѓоревска, за македонските производи имало голем интерес од посетителите на базарот.
Македонскиот штанд бил посетен од првата дама на Полска, Агата Корнхаусер-Дуда, која е покровител на овој хуманитарен настан. Атанасова Ѓоревска ја запознала Корнхаусер-Дуда со дел од палетата македонски производи.
Со учеството на базарот нашата Амбасада во Полска имаше можност да ги презентира и промовира македонските производи, а воедно и да даде придонес за хуманитарни цели. Хуманитарниот базар, кој се одржа вчера, бил посетен од околу 5.000 посетители.