Во организација на Општинската Организација на Црвен крст од Велес и Институтот за трансфузиона медицина денеска во фоајето на Новиот театар се одржува 22-та по ред традиционална летна акција за доброволно крводарување меѓу граѓаните на Велес.
На денешниот прв ден од акцијата се собрани околу 120 крвни единици, изјави д-р Бојан Тодоровски од Институтот за трансфузиона медицина.
– Задоволни сме од хуманоста на граѓаните на Велес кои и годинава по традиција самоиницијативно доаѓаат да даруваат крв и спасат нечиј живот. За пофалба е што имаше и многу млади крводарители и повозрасни, а воедно 20 млади луѓе денеска за првпат даруваа крв и се приклучија во Друштвото на хуманите, рече Тодоровски.
За крводарителите, организаторите и годинава обезбедија лотарија со награди.
Оваа летна акција за доброволно дарување на крв во зградата на театарот во Велес продолжува и утре од 7:30 до 14:00 часот.