Министерот за образование и наука Панче Кралев очекува да бидат надминати проблемите со промената на таблите со имињата на четири училишта во Чаир, формирањето комбинирани паралелки во Долно Лисиче и Сарај и долговите на општините во областа на образованието.
„Во координација со ЗЕЛС веќе работиме на изнаоѓање системско решение за начинот на кој во иднина ќе се донесуваат одлуките поврзани со комбинираните паралелки. Треба да се имаат предвид повеќе фактори, а не само одлучувачкиот фактор дали има доволно простории во некое училиште. Формирана е работна група која ќе изготви систематски пристап и преглед на начинот на кој во иднина ќе се дозволува да се комбинираат паралелки“, изјави министерот за образование Панче Кралев.