Скопје е меѓу десетте најзагадени големи градови во Светот според листата на IQAir. Во текот на денов, главниот град постојано беше на врвот на листата според штетните честички во воздухот. Најалармантни се бројките на мерната станица во Лисиче.
Но, исклучително лоши показатели, со неколкукратно повеќе отровни честички од она што го предвидува Светската здравствена организација се и Кочани, Струмица, Тетово и Гостивар.
Владата најави акциски план за намалување на загадувањето.
– Имаме акционен план за намалување на загадувањето на воздухот. Еден од проектите е гасификација на урбаните центри, иако неколку пати не успеал, треба да се изврши повторен обид бидејќи има заинтересирани компании кои би го спровеле ова преку јавно-приватно партнерство – изјави министерот за животна средина и вицепремиер Изет Меџити.
Според СЗО, годишно има по седум милиони смртни случаи поврзани со загаден воздух, дури 91 процент од светското население живее во региони во кои загадувањето на воздухот ги надминува пропишаните лимити.