Коалицијата на ГРОМ, ЛДП, Интегра и ПЦЕР, „Искуство за успех“ ги претстави своите кандидати за градоначалници и советници за претстојните локални избори.
Присутните имаа можност непосредно да чујат дел од предлозите на кандидатите и лично да се уверат дека станува збор за тим кој гарантира резултати, велат од коалицијата.
Со желби за успех и добар исход на изборите, поздравни говори одржаа претседателите на партиите членки на коалицијата „Искуство за успех“ – ЛДП, ГРОМ, Интегра и ПЦЕР.
„Македонија и нејзините градови, села, општини можат да бидат пристојни места полни со живот. Имаме луѓе, имаме решенија, имаме знаење. А кога луѓето кои имаат искуство, знаење, капацитети и тим ќе седнат да работат, тогаш се носат вистински одлуки и се испорачуваат видливи резултати кои се потребни за граѓаните”, истакна во своето обраќање претседателката на ЛДП, Моника Зајкова.
Од коалицијата велат дека нема повеќе зборови во ветар, изневерени очекувања, расправии, суети и инаетење – само резултати и помалку изговори.
Коалицијата „Искуство за успех“ на претстојните локални избори ќе настапи со 10 кандидати за градоначалници и 36 советнички листи, меѓу кои и носителот на советничката листа за Град Скопје, Ристо Пенов и вториот на листата, веднаш под него, докторот Никола Пановски. Кандидат за градоначалник на Град Скопје од коалицијата „Искуство за успех“ е Александар Трајановски, советник и поранешен заменик-градоначалник на главниот град.