Министерството за одбрана ги откажа сите активности предвидени за прославата на Денот на АРМ – 18 Август, поради поплавите во скопскиот регион. Оваа информација за „Утрински весник“ ја потврди и министерот Зоран Јолевски, кој рече дека „не е време за славење“.
Причина се катастрофалните поплави во Скопско. Претходно дел од поканетите, најавија дека нема да учествуваат на прославата. Еден од нив е генералот во пензија, Илија Николовски.
Тој упати отворено писмо до Јолевски, во кое вели дека со целосна почит кон традицијата на великите денови на државноста и самостојноста на Република Македонија, сепак, нема да се појави на прославата на 24-от роденден на АРМ, иако е таму од првите денови.
„Дегутантно, крајно нечувствително, непримерно, несоодветно на рангот кој го стекнав за време на своето службување во… (две армии и неколку држави) и едукациите од највисоко ниво кои ги поминав за тоа време е поканите да ги прифатам“, напиша Николовски.