Преземени се мерки за санирање на последиците од поплавите во струмичкиот регион, а во следниот период превентивно ќе се работи со цел да се спречат евентуални нови непогоди, изјави министерот за транспорт и врски Миле Јанакиески по денешната посета на поплавените подрачја.
– Ја увидов состојбата на терен. На овие локации веќе е интервенирано, но ние постојано соработуваме со општините со цел да ги намалиме последиците од надојдените води и да ја санираме состојбата, истакна Јанакиески.
Тој ги посети селата Бисолово, Василево и Сушево каде беа забележани најголеми поплавувања во текот на денешниот ден.
Според информациите од Дирекцијата за заштита и спасување (ДЗС), врнежите од дожд предизвикаа поплавување на станбени и деловни објекти, а излеаните води од реките Радовишка и Водочница поплавиле земјоделски површини.
Од страна на ДЗС обезбедени се повеќе од три илјади вреќи со песок за правење насип на критичните места, како и пумпи за исцрпување на водата од објектите. Во соработка со општините ангажирана е и градежна механизација за правење насипи на речните корита.
