Министерството за образование и наука во соработка со Мисијата на ОБСЕ во Скопје избра три основни и две средни, најбезбедни и најчисти училишта во Република Македонија за учебната 2014/2015 година.
Во конкуренција на 18 основни училишта, првото место му припадна на ОУ „Владо Кантарџиев“ од Гевгелија, второто на ОУ „Климент Охридски“ во село Драчево во општина Кисела Вода и третото место за ООУ „Климент Охридски“ од Македонски Брод.
Во категоријата на средни училишта пристигнале шест апликации, од кои за најбезбедни и најчисти се избрани две училишта во Скопје – „Владо Тасевски“ (прво место) и „Никола Карев“ (второ место).
Јавниот повик за „Најбезбедно и најчисто училиште” беше во рамки на истоимениот проект, чија цел е зголемување на безбедноста и хигиената во училиштата.
– Изборот на најбезбедно и најчисто училиште го изврши стручна комисија, формирана од Министерството за образование и наука, врз основа на пристигнати апликации и увид во самите училишта. За избраните училишта ќе следуваат соодветни награди, обезбедени од Мисијата на ОБСЕ во Скопје, соопшти Министерството за обрзование и наука.